فوتو: 7282.kz
بۇل يگى شاراعا قازاقستان حالقى اسسامبلەياسى جانىنداعى «قوعامدىق كەلىسىم» كمم باستاماشى بولىپ وتىر. ونىڭ اياسىندا سوعىس جانە ەڭبەك ارداگەرلەرىنە جانە مۇمكىندىگى شەكتەۋلى جاندارعا مورالدىك جانە ماتەريالدىق تۇرعىدان ءار ءتۇرلى كومەكتەر كورسەتىلۋدە. اتالعان داتانىڭ كوكتەمنىڭ العاشقى كۇنىنە سايكەس كەلۋى تەكتەن تەك ەمەس. ءدال وسى كۇنى مەملەكەت باسشىسىنىڭ جارلىعىنا سايكەس قازاقستان حالقى اسسامبلەياسى قۇرىلدى. ويدى وي جالعايدى. تاعدىردىڭ تالكەگىنە تاپ بولىپ قاسيەتتى قازاق جەرىنە ەرىكسىز جەر اۋدارىلعان ەتنوس وكىلدەرى قانشاما؟! ولاردىڭ قازاق حالقىنا ايتاتىن العىستارى شەكسىز ەكەنى انىق. سونىڭ باستى ءبىر بەلگىسى مەن كورىنىسى وتكەن جىلى تاۋەلسىزدىك مەرەكەسى قارساڭىندا اقتوبە قالاسىندا «قازاق حالقىنا مىڭ العىس» اتتى كوككە بوي سوزعان, ۇشار باسىندا قالىقتاعان قىراننىڭ بەينەسى بەدەرلەنگەن كەلىستى كەشەننىڭ تۇرعىزىلعانى دەۋگە بولادى. ءبىر سوزبەن ايتقاندا بۇل كۇن ىنتىماق پەن قايىرىمدىلىقتىڭ جانە مەيىرىمدىلىك پەن توزىمدىكتىڭ تاپتىرماس ۇلگىسىن بىلدىرە الاتىنى انىق.
مىنە, ءدال وسىنداي ماقساتتا بۇگىنگى كۇنى ونەركاسىبى وركەندەگەن وڭىردە سان قىرلى ءىس-شارالار كەڭىنەن قانات جايىپ وتىر. سونداي-اق اپتالىق اياسىندا از قامتىلعان جانە كوپ بالالى وتباسىلارعا قايىرىمدىلىق كومەكتەر كورسەتۋ ءىسى دە قوسا اتقارىلۋدا, - دەيدى قازاقستان حالقى اسسامبلەياسى اقساقالدار كەڭەسىنىڭ توراعاسى ەركىن قۇرمانبەك. ال كارىس ۇلتىنىڭ وكىلى ەلىمىزدەگى ءبىلىم بەرۋ ءىسىنىڭ ارداگەرى ەليزاۆەتا كيم گازەت تىلشىسىنە ءوز تىلەگىن بىلايشا جەتكىزدى:
«قازاقستان كوپتەگەن ەتنوس وكىلدەرىنىڭ باسىن بىرىكتىرىپ وتىرعان ىزگى مەملەكەت. ەتنوستىق ەرەكشەلىگىمىزگە قاراماستان ءبىز ءبارىمىز دە قازاقستاندىقتارمىز. ءبىزدىڭ ورتاق وتانىمىز – قازاقستان. مۇندا ەركىن, ازات تاۋەلسىز ەلدە العىس ايتۋ كۇنى بەلگىلەنۋىنىڭ ماڭىزى زور, ءمانىسى تەرەڭ. وسىنداي مەرەكەگە تاتيتىنداي كۇن ادامداردى ءبىر بىرىنە ودان سايىن جاقىنداستىرا تۇسەدى. ءارى ءبىر بىرىنە دەگەن قۇرمەتى مەن سىيلاستىق سەزىمىن تەرەڭدەتە الادى. ءبىزدىڭ بارلىق جەتىستىكتەرىمىز ەڭ الدىمەن وسىنداي ىنتىماق پەن اۋىزبىرشىلىكتىڭ ارقاسىندا دەپ ەسەپتەيمىن. سونىڭ ىشىندە ءبىر كەزدەرى دەپورتاتسياعا ۇشىراعان كەزدە قازاق جەرىنەن پانا تاپقان كورەي حالقى وكىلدەرىنىڭ قازاق حالقىنا ايتاتىن العىسى مول», دەپ اياقتادى ءوز ريزاشىلىعىن ە.كيم حانىم.
سونداي-اق ايماقتا العىس ايتۋ كۇنىنە ارنالعان اپتالىق اياسىندا مەملەكەتتىك ءتىلدى جانە قازاقستان ەتنوستارى تىلدەرىن وقىتاتىن جەكسەنبىلىك مەكتەپتەردە تەگىن دارىستەر تىڭدالدى.
تەمىر قۇسايىن
«ەگەمەن قازاقستان»
اقتوبە
